Sabide ai 8 di Març il Borc de Stazion di Udin al deventarà la crosere di culturis e profums in graciis de “Fieste des magnoliis”, event nassût par valorizâ chest cuartîr de citât e celebrâ la bielece dai arbui che a insiorin il cûr multietnic di Udin, indulà che il 40% dai residents al rive dal forest. “E sarà une zornade par scuvierzi un lûc unic, un mosaic di storiis e tradizions – al vise Marco Orioles, sociolic e anime de iniziative -. Lis magnoliis in rose a son la curnîs perfete par scuvierzi un cuartîr vivarôs indulà che lis culturis si cjatin e si messedin, dant vite a une atmosfere uniche”.
La fieste e tacarà a misdì e mieç in vie Roma. Il prin apontament al è cui savôrs de Persie antighe e cu la presentazion dal libri “Tirana e dintorni” de gjornaliste Simonetta Di Zanutto, un dialic viert su la Albanie. A son cetancj i apontaments ancje tal dopomisdì. (a.d.g.) – 07.03.2025
