Fin de setemane cun motos e autos americanis a Lignan

E torne dai 14 ai 17 di Setembar a Lignan la “Italian Bike Week”, la manifestazion di fin Istât che e siere la stagjon iniziade in Mai cu la Biker Fest International. E compagn di chê, e pues contâ su la presince dai autos americans, che a saran protagoniscj a cuatri ruedis de seconde edizion dal “US Car on the Beach”. A cualchi mês de “US Car Reunion”, che e à puartât a Lignan plui di 400 veturis di produzion statunitense, i potents motors americans a tornaran a animâ la localitât: si spietin centenârs di veicui (par inglês: “muscle car”, “pick up”, “hot rod”…) di dute Italie e dal forest, pe tradizionâl parade di domenie di matine. I modei plui rârs e i esemplârs miôr conservâts a saran premiâts di une jurie di esperts. (A.I.) – 13.09.2023