Il parc di Vile de Claricini in fieste tant cun altris 20 Paîs europeans

Domenie ai 4 di Jugn al torne l’apontament in zardin, une iniziative inmaneade de fondazion de Claricini e de associazion Parchi e Giardini d’Italia. La manifestazion, pensade tant che une fieste dal zardin, e nas in acuardi cu la iniziative “Rendez-vous aux jardins”, che si fasarà in contemporanie in passe 20 Paîs europeans e che e à l’obietîf di invidâ il public a scuvierzi la ricjece storiche, artistiche, botaniche e paisagjistiche dai zardins talians. Di sugjestion particolâr il teme de edizion 2023, “musichis dal zardin”. Pe ocasion, a Vile de Claricini Dornpacher, a Butinins di Muimans, il parc si podarà visitâ cul supuart di audiovuidis. Aes 6.30 dal dopomisdì, il prin dai Concierts in vile cul Alma Strings Ensemble e il solist Lucio Degani al violin. (A.I.) – 02.06.2023