Mascarade di Remanzâs: e je di gnûf fieste par ‘Bocâl’ e i siei amîs

Al torne, ancje in periodi di cuaresime, l’apontament storic de ‘Mascarade di Remanzâs’. Une tradizion che e fonde lis sôs lidrîs almancul intal lontan 1921 – daûr des cronichis ripuartadis dai gjornâi – e che domenie ai 5, des 2.30 dal dopomisdì, e viodarà la sfilade di tancj cjars alegorics e grups inmascarâts che a vegnin di dute la regjon. La sfilade e sarà vierte des motos di epoche de colezion privade dal Moto Museo di Roberto Tonutti e e sarà acompagnade de musiche de Gnove Bande di Orçan e des danzis tradizionâls dal grup folcloristic “Chei di Bocâl”, dal non de mascare furlane nassude intai Agns 20 dal secul passât, gaiarine e cu la passion pal bon vin. Tal ultin, in place Paolo Diacono, premiazion dai cjars e dai grups inmascarâts e musiche cui Area70. (A.I.) – 03.03.2023