A Cjanive, i zovins a judin i nonos a deventâ ‘digjitâi’

Cuindis zovins tra i 13 e i 24 agns a metin a disposizion lis lôr abilitâts e competencis par insegnâ ai anzians “over 65” i segrets dal univiers digjitâl. Al è partît a Vile Frova di Cjanive il progjet “Adesso ci penso io”, che al à l’obietîf di furnî lis informazions necessariis par doprâ il smartphone, consultâ la pueste eletroniche, gjestî la proprie identitât digjitâl SPID o consultâ il propri fassicul sanitari su SESAMO. Cofinanziât de Regjon, promovût dal Comun di Cjanive e gjestît de Cooperative sociâl Itaca, il percors al è componût di cinc incuintris, ducj pe tierce etât, cul sottitul “Nonos digjitâi”. (A.I.) – 13.10.2022